दुर्गमका प्राङ्गारिक कृषि उपज काठमाडौँमा
काठमाडौँ, ६ पुस । पैँचो पसल प्रालिले पहाडी तथा उच्च पहाडी भेगका किसानले उत्पादन गरेका प्राङ्गरिक कृषि उपज मङ्गलबारदेखि काठमाडौँमा ल्याएको छ ।
सो संस्थाले अचार, मकैको पीठो, कोदोको पीठो, गुन्द्रुक, मस्यौरा तथा विभिन्न प्रकारका जुस बजारमा ल्याएको छ । यहाँ मङ्गलबार आयोजित पत्रकार सम्मेलनमा कम्पनीका प्रबन्ध निर्देशक ध्रुव न्यौपानेले ती उत्पादनको बजारमा राम्रो माग भएकाले नयाँ उत्पादन बजारमा ल्याउन लागिएको जानकारी दिनुभयो ।
उहाँले गत वर्ष सो संस्थाले रु १५ करोडको कारोबार गरेको जानकारी दिँदै यस वर्ष दक्षिण एसियाली मुलुक (सार्क) सम्म उत्पादन विस्तार गरिने बताउनुभयो । गुल्मी, अर्घाखाँची, जुम्ला, रुकुम, कालीकोट, रोल्पा र पाल्पामा करिब ५० सङ्कलन केन्द्र विस्तार गरी विभिन्न जिल्लामा सामग्री आपूर्ति गर्दै आएको सो संस्थाले मकैको पीठो, मस्यौरा पहिलो पटक ल्याएको हो ।
गुल्मीको रिडीमा प्रशोधन उद्योग स्थापना गरी स्थानीय उत्पादनलाई प्रशोधन गर्न सुरु गरेको कम्पनीले स्थानीय कृषकका उत्पादनलाई खरिद गरी विभिन्न उत्पादन गरी त्यसको बजारीकरण गरेको छ । सो संस्थाले प्रत्यक्ष तथा अप्रत्यक्ष गरी करिब १० हजारलाई रोजगारी प्रदान गरेको बताएको छ ।
