सभाहल निर्माण गर्न मन्त्रीको ध्यानाकर्षण
रत्ननगर (चितवन), १८ माघ । सरकारको रातो किताबमा समेत समावेश भएको सुविधायुक्त ‘सौराहा सभाहल’ निर्माणका लागि स्थानीय पर्यटन व्यवसायी तथा संरक्षणकर्मीले सहरी विकास मन्त्रालयको ध्यानाकर्षण गराएका छन् ।
सोमबार राजधानीस्थित सहरी विकासमन्त्री अर्जुननरसिंह केसीको निवासमै पुगेर यहाँका व्यवसायी, नागरिक प्रतिनिधि तथा दलीय प्रतिनिधिको एक टोलीले मन्त्रीको ध्यानाकर्षण गराएका हुन् ।
क्षेत्रीय होटल सङ्घ, सौराहा, चितवनका अध्यक्ष सुमन घिमिरेको नेतृत्वमा काठमाडौँ पुगेको टोलीले सभाहल निर्माणलाई तदारुकताका साथ अघि बढाउन मन्त्रीलाई आग्रह समेत गरेका छन् ।
सरकारी रातो किताबमा उल्लेख भएको उक्त सभाहल करिब पाँच हजार मानिस अट्ने क्षमताको हुनुपर्ने माग गरिएकोे सङ्घले जनाएको छ । उक्त सभाहल सौराहामै निर्माण गर्ने भनी स्पष्ट उल्लेख हुँदाहुँदै सहरी विकास तथा भवन निर्माण डिभिजन कार्यालय चितवनले अन्यत्रै बजेट लगेर निर्माण सुरु गरेको सुन्नमा आएकाले मन्त्रीको ध्यानाकर्षण गराएको सङ्घका महासचिव राममणि खनालले जानकारी दिनुभयो ।
“सभाहलका विषयमा सम्बन्धित निकायमा पटकपटक ध्यानाकर्षण गराउँदा समेत सुनुवाइ नभएकाले प्रस्ताव गरिएको योजना सौराहामै निर्माण गर्न माग गर्दै यहाँको ध्यानाकर्षण गराउँछाँैं” मन्त्रीसमक्ष पेस गरिएको ध्यानाकर्षण पत्रमा उल्लेख छ ।
ध्यानाकर्षण पत्र बुझ्दै मन्त्री केसीले सौराहामा सभाहल निर्माणका लागि कुनै दुई मत नरहेको भन्दै आफूले आवश्यक अध्ययन गरी समस्या समाधानको प्रयास गर्ने आश्वासन दिनुभएको छ ।
उहाँले तत्कालै मन्त्रालयका सचिव दीपेन्द्रनाथ शर्मामार्फत सो विषयमा यथार्थ जानकारी दिन निर्देशन दिनुभएको छ ।
क्षेत्रीय होटल सङ्घ सौराहाका कोषाध्यक्ष शिरलाल परियारले सौराहामा सभाहल अत्यावश्यक भएकाले व्यवसायी अग्रसर भएर अघि बढेको बताउनुभयो ।
ध्यानाकर्षण बुझाउने टोलीमा सहभागी रत्ननगरको मृगकुञ्ज उपभोक्ता समितिका अध्यक्ष वासु ढुङ्गानाले सोमबारै सचिव शर्मालाई समेत भेटेर आवश्यक छलफल गरेको जानकारी दिनुभयो ।
सचिव शर्माले सौराहामा सुविधायुक्त सभाहल निर्माण हुने विश्वास दिलाउनुभएको छ । सो सभाहलका लागि यहाँ रु चार करोड बजेट समेत विनियोजन भइसकेको छ । सोही रकम रकमान्तर गर्ने दुस्साहस भएकाले मन्त्रालयसम्म आउनुपरेको सङ्घका महासचिव राममणि खनालले बताउनुभयो । रासस
