अधिकारबारे सचेत बन्दै ग्रामीण क्षेत्रका महिला
इनरुवा, ६ माघ । सुनसरी कप्तानगन्ज–२ की शोभाकुमारी मेहतालाई गाविसमा एक वर्षमा कति बजेट आउँछ र कहाँ खर्च हुन्छ भने केही थाहा थिएन । तर अहिले उहाँलाइ सबै कुरा थाहा भइसकेको छ । कारण एउटै हो– सामुदायिक विकास परियोजनाबाट प्राप्त गरेको तालिम ।
मेहता त एउटा गाविसका लागि उदाहरणका पात्र मात्र हुनुहुन्छ । उहाँ जस्तै जिल्लामा अन्य गाविसका महिलालाई सुनसरी सदरमुकाम इनरुवामा रहेको सामुदायिक विकास कार्यक्रम (सिडिपी)ले तालिम दिएपछि सबै गाविसमा आउने बजेट खर्च हुने विषयमा जानकार भइसक्नुभएको छ ।
सिडिपीले सुनसरी सदरमुकाम इनरुवासहित जिल्लाका विभिन्न ठाउँमा १० समूहमा दुई सय ५५ जना महिलालाई चारदिन तालिम दिएपछि महिलाले सबै कुरा थाहा पाउन थाल्नुभएको छ । संस्थाले सुनसरीको हरिपुर, मधुवन, प्रकाशपुर, लौकही, श्रीपुरजब्दी लगायतका गाविसमा महिलाको भेला गराई विभिन्न समूह गठन गरेर विकासमा पहुँच पु¥याउनका लागि विभिन्न किसिमको कार्यक्रम गर्दै आएको छ ।
सोही कार्यक्रमअन्तर्गत सिडिपीले जिल्लाको १५ वटा गाविसमा महिलालाई एकत्रित गरेर गाविसमा आउने बजेट र खर्च हुने बजेटको विषयमा प्रशिक्षण दिएपछि अहिले महिलाले आफ्नो अधिकार खोज्न र आफूहरुका लागि आएको बजेट कहाँ खर्च भइरहेको छ भने विषयमा चासो राख्न थालेको सिडिपीकी सहजकर्ता पवित्रा कार्कीले बताउनुभयो ।
जिल्लाका महिलालाई जागरुक बनाउँदै पछाडि परेको समुदायलाई विकास निर्माण र अफ्नो अधिकार खोजी गर्नका लागि सक्षम बनाउने आफूहरुको उद्देश्य रहेको सिडिपी सुनसरीका कार्यक्रम संयोजक सरस्वती कोइरालाले बताउनुभयो ।
यसरी गैरसरकारी संस्थाप्रति विभिन्न किसिमका टीकाटिप्पणी भइरहेको बेला सिडिपीले गरेका कामले स्थानीयवासी खुसीसमेत भएका छन् । सिडिपी जस्तै अन्य गैरसरकारी संस्थाले कार्यक्रम तथा काम ग¥यो भने पक्कै पनि गाविसमा रहेका अशिक्षित व्यक्तिलाई शिक्षित तुल्याएर आफ्नो अधिकार खोज्ने सवालमा कोही पनि पछि नपर्ने स्पष्ट छ । रासस
