उद्योग मन्त्रालय र इन्जिनियर्स एसोसियसनबीच सहकार्यका लागि सम्झौता
काठमाडौँ, ४ माघ । नेपालको उद्योग र उद्यमशीलताको विकासमा अब इन्जिनियर्स एसोसियसनले पनि सहकार्य गर्ने भएको छ ।
उद्योग मन्त्रालय र एसोसियसनबीच तीन महिनाभित्र संयुक्त कार्ययोजना बनाई अगाडि बढ्ने सम्झौतामा आज हस्ताक्षर भएको छ ।
उद्योग मन्त्री नवीन्द्रराज जोशीको रोहबरमा योजना महाशाखा प्रमुख दिनेश घिमिरे र एसोसियसनका अध्यक्ष हरेराम श्रेष्ठले सम्झौतापत्रमा हस्ताक्षर गर्नुभयो ।
मन्त्री जोशीले नेपालको उद्योग विकासका लागि सबै खाले जनशक्ति समन्वय गरेर काम गर्न नसकिएको बताउनुभयो । उहाँले भन्नुभयो, “देशको लागि योगदान गर्न चाहने नेपाली दक्ष जनशक्तिलाई उपयुक्त फोरमको वातावरण तयार गरेको छ । यसले नेपालको विकासमा नयाँ उद्यमशीलताको विकासका रुपमा यो सम्झौतालाई लिएको छु ।”
एसोसियसनका अध्यक्ष श्रेष्ठले आफूहरु पेसागत सङ्गठनमा भए पनि देशको लागि आफ्नो योगदान दिन तयार रहेको बताउनुभयो । रासस
