निजी क्षेत्रको आधारबिना मुलुक अगाडि बढ्न सक्दैन
काठमाडौँ, २९ पुस । निजी क्षेत्रको आधारबिना मुलुक अगाडि बढ्न नसक्ने व्यवसायीहरुले बताएका छन् ।
खिचापोखरी न्युरोड व्यापार सङ्घको ‘नवौँ वार्षिक साधारण सभा’का अवसरमा आज यहाँ आयोजित कार्यक्रममा नेपाल चेम्बर अफ कमर्शका अध्यक्ष डा राजेशकाजी श्रेष्ठले निजी क्षेत्रलाई अगाडि बढाउन नसके मुलुक अगाडि बढ्न नसक्ने बताउनुभयो ।
उहाँले भन्नुभयो, “निजी क्षेत्रबाट तिरेको करले मुलुक चलेको छ त्यसैले मुलुकले निजी क्षेत्रलाई बेवास्ता गर्न मिल्दैन ।” अध्यक्ष श्रेष्ठले व्यापारीप्रति सरकारको विश्वास नहुँदा व्यापार क्षेत्रमा समस्या हुने गरेको गुनासो गर्नुभयो ।
आन्तरिक राजस्व विभागका उपमहानिर्देशक धनिराम शर्माले कर नीतिको माध्यामबाट लगानी सुरक्षित गर्न व्यापारीलाई आग्रह गर्नुभयो ।
महानगरीय ट्राफिक प्रहरी महाशाखाका प्रहरी वरिष्ठ उपरीक्षक मिलन बस्नेतले न्युरोड क्षेत्रको ट्राफिक व्यवस्थापनका लागि महाशाखा लागिरहेको स्पष्ट पार्नुभयो । उहाँले भन्नुभयो, “सम्पूर्ण पक्ष एकजुट भए न्युरोड क्षेत्रको समस्याको समाधान हुन्छ ।” राष्ट्रिय अर्थतन्त्रमा टेवा पु¥याउन निजी क्षेत्रको महत्वपूर्ण भूमिका रहेको उहाँको भनाइ थियो ।
सङ्घका अध्यक्ष मनोजबाबु श्रेष्ठ, पूर्व अध्यक्ष राजेन्द्र शेरचन, करदाता सेवा कार्यालय न्युरोड शाखाका प्रमुख मुक्तिराम आचार्य, नेपाल चेम्बर अफ कमर्शका सचिव पर्शुराम दाहाललगायतले काठमाडौँको मुटुमा रहेको खिचापोखरी, न्युरोड क्षेत्रको समस्या समाधानका लागि सम्बन्धित पक्ष गम्भीर हुनुपर्नेमा जोड दिनुभयो । कार्यक्रममा व्यापारको क्षेत्रमा महत्वपूर्ण योगदान पु¥याएका व्यापारीलाई सम्मान गरिएको थियो । रासस
