जब होटलमा छापा हान्न आफैं हिंडे गृहमन्त्री

आन्दोलनरत मिटरब्याज पीडितसँग सरकारले शुक्रबार नौ बुँदे सहमति गरेको छ । जनकपुरको तिरहुतियागाछीबाट सुरु भएको आन्दोलन नवौं दिनमा आएर सकिएको हो ।

सरकारले वार्ताको प्रयास भने पाँचौँ दिनदेखि गरेको थियो । तराई–मधेशका मिटरब्याज पीडितहरूले विभिन्न ६ सुत्रीय माग राखेर २५ असारमा तिरहुतियागाछीबाट काठमाडौंका लागि पैदल मार्चपास सुरु गरेका थिए ।

दैनिक करिब २५ किलोमिटरसम्मको यात्रा तय गर्दै काठमाडौंतर्फ अघि बढेको पाँच दिनपछि ३० असारमा गृहमन्त्री सुधन गुरुङ मिटरब्याज पीडितलाई भेट्न भन्दै काठमाडौंबाट हवाईमार्ग हुँदै बाराको सिमरा विमानस्थल ओर्लिए । तीन दिनसम्म सिमरा नै बसेर मिटरब्याज पीडितसँग छलफल गरे पनि गृहमन्त्रीको आश्वासनमा उनीहरू विश्वस्त भएनन् ।

‘हिंडेर काठमाडौं गए पनि अन्त्यमा भेट्ने मलाइ नै हो । तपाईंहरूलाई दुःख नदिन म आफैं यहाँ भेट्न आइरहेको छु । पहिलाको सरकार भएको भए यसरी कोही आउँथ्यो ?,’ गुरुङ मिटरब्याज पीडितलाई भावनात्मक रूपमा पनि मनाउने प्रयास गरेका थिए ।

लिखित प्रतिबद्धता चाहिने भन्दै उनीहरू आफ्नो अडानमा कायम रहे । छलफल निष्कर्षविहीन भएपछि काठमाडौं जाने निष्कर्षमा मिटरब्याज पीडित रहे । मिटरब्याज पीडितका अगुवाहरू सिमराबाट हेलिकप्टरमा काठमाडौं आउने भए ।

छलफल निष्कर्षविहीन भएपछि मन्त्री गुरुङ भने जहाजबाट सोझै काठमाडौं आएनन् । उनी त बरू छड्के र अनुगमनमा व्यस्त रहे । यतिसम्म कि गृहमन्त्री गुरुङ आफैंले सुरक्षाको दलबलसहित होटल पुगेर छापा मारेका थिए ।

पर्साबाट चितवनतर्फ जाने क्रममा पर्साको ठोरी गाउँपालिका–२ स्थित ठोरी बजारमा उनको केही स्थानीयहरूसँग भेट भयो । तिनै स्थानीयले सूचना दिएपछि मन्त्री गुरुङ सुरक्षाकर्मी लिएर राति ७ः४० बजे दुई होटलमा पुगेर छापा मारेको जानकारहरू बताउँछन् ।

स्रोतका अनुसार, उनले ठोरी बजारमा रहेको ‘ठोरी दोहोरी साँझ’ र ‘रिसोर्ट ठोरी क्याम्प फायर होटल’ मा छापा मारेका थिए । होटल सञ्चालक, होटल स्टाफ र गेस्टसहित ९ जनालाई पक्राउ गरेर इलाका प्रहरी कार्यालय ठोरीमा लगिएको थियो । यसरी पक्राउ गरिएकामध्ये ७ युवती र दुई होटल सञ्चालक रहेको बताइएको छ ।

छापा मारेर व्यक्ति नियन्त्रणमा लिनुको पछाडि ती होटल तथा दोहोरी साँझमा ‘अनैतिक क्रियाकलाप हुने गरेको’ दाबी छ । छापा मार्न सशस्त्र प्रहरीको नं. १३ गणका गणपति एसपी, बोर्डर आउट पोस्ट (बीओपी)का ठोरीका इन्सपेक्टर र नेपाल प्रहरीको टोली समेत पुगेको थियो ।मन्त्रीसहितको उपस्थितीमा छापा मारेर व्यक्ति पक्राउ गरिएको उच्च स्रोतले पनि पुष्टि गरेको छ । ‘मन्त्रीज्यूको उपस्थितीमा दुई होटलमा छापा मारेर मान्छे पक्राउ गरिएको हो । स्थानीयले सूचना दिएपछि मन्त्रीज्यूकै निर्देशनमा उहाँकै उपस्थितिमा छापा मारेर पक्राउ गरिएको हो,’ उच्च स्रोतले भन्यो ।