धुलो र हिलोले विराटनगरका सडक अस्तव्यस्त
पथरी (मोरङ), २८ पुस विराटनगरका सबै सडक भत्काइएपछि स्थानीयवासीलाई सास्ती सुरु भएको छ । विराटनगरवासीको यो क्रम अहिले निर्माणको ७० प्रतिशत काम सम्पन्न भएको बताइरहँदा समेत अझै नागरिक सास्तीमुक्त भएका छैनन् ।
विराटनगर–१० का स्थानीयवासी राजकुमार ढुङ्गाना भन्नुहुन्छ, “हामीलाई हिँड्नै गाह्रो भयो, धुलोले रोगी बनाउने भयो ।” जताततै धुलो र पानी पर्दा हिलाम्ये हुने गरी बिग्रे–भत्केका सडकले पूर्वको व्यापारिक केन्द्र विराटनगरका सडक भद्रगोल भएका छन् ।
यी सडकमा यतिबेला सबैभन्दा धेरै काम भइरहेका छन् । विराटनगरको रोडशेष नजिकै रहेको साल्ट्रेडिङबाट सुरु भएको काम एक वर्ष बितिसक्दा बल्ल गुद्री नजिकै आइपुगेको छ । भत्काइएका सडकबाट निस्किएको धुलोका कारण विराटनगरका धेरै घरमा बिरामी बढेको विराटनगर–१ पोखरियाकी देवी गौतमको भनाइ छ ।
उहाँले भन्नुभयो, “भनीसाध्य छैन घरमा दिनहुँ बिरामी हुन्छन् ।” विराटनगर उपमहानगरपालिका मझौला सहर एकीकृत सहरी वातावरणीय सुधार परियोजनाको काममा ढिलासुस्ती गर्नु, कामलाई तीव्रता दिन नसक्नु, अनि एक किलोमिटरको दूरीको कामलाई महिना दिन लगाउनुले अर्को एउटा जिज्ञासा सिर्जना गरेको छ । अहिले विराटनगरको मुख्य राजमार्ग कोसी राजमार्गअन्तर्गतको रोडशेष चोकदेखि मुनालपथसम्म हिँड्नै नसक्ने अवस्था छ । त्यसको मुख्य कारण भनेको खनिएका माटोबाट निस्किएको धुलोबाट सिर्जित समस्या हो ।
परियोजनामार्फत काम सुरु भएको तीन वर्ष पुगिसकेको छ । पहिलो चरणमा रु तीन अर्ब ४० करोडको काम अहिले पनि जारी रहेको छ । त्यसैगरी, रु तीन अर्ब २० करोड रकम अझै यही कामका लागि भित्र्याउने तयारी भइरहेको छ । तर यसले विराटनगरको मुहार नै फेर्ने आशा विराटनगरवासीले बोकेका छन् ।
अहिलेसम्मको तथ्याङ्कलाई आधार मान्दा जम्मा ७० प्रतिशत मात्र काम सकिएको परियोजनाको दाबी छ । एकातिर सवारीको चाप बढ्दै गएको विराटनगरको अस्तव्यस्तताको बाबजुद निर्माणको कामले तीव्रता पाएको परियोजनाले दाबी गरेको छ ।
सडकको निर्माणमा ६ लेन सडक परियोजना तथा मझौला सहर एकीकृत वातावरणीय सुधार परियोजनाले काम गरिरहेका छन् । एकातिर अहिले नै ६ लेनको काम एकातिर छ ।
अबको जेठ सम्ममा पहिलो चरणको रु तीन अर्ब ४० करोड सकिने गरी काम भइरहेको र त्यसपछिको काम अर्को सम्झौतापछि सुरु हुने विराटनगर उपमहानगरपालिका मझौला सहर एकीकृत सहरी वातावरणीय सुधार परियोजनाका उपेन्द्र बरालको भनाइ छ । रासस
