कमल थापाको नयाँ प्रस्ताव : कार्यदल बनाएर विवादित मुद्दा टुँगो लगाउने
काठमाडौं, ११ पुस । सत्तारुढ दल राष्ट्रिय प्रजातन्त्र पार्टीका केन्द्रिय अध्यक्ष कमल थापाले जारी राजनीतिक गत्यावरोध फुकाउनको लागि नयाँ प्रस्ताव अघि सारेका छन् ।
सोमबार सभामुख ओनसरी घर्तीमगरले डाकेको ७ दलको बैठकमा अध्यक्ष थापाले जारी राजनीतिक गत्यावरोध फुकाउनको लागि एउटा शक्तिशाली कार्यदल बनाउने नयाँ प्रस्ताव अघि सारेका हुन् ।
थापाले अहिले देखिएका जतिपनि विवादित मुद्दालाई टुँगो लगाउन कार्यदल बनाउने र तीन मुद्दालाई एक महिनाभित्र टुँग्याउने सहमति गर्नेगरि दलहरु अघि बढ्नुपर्ने प्रस्ताव राखेका थिए । उनको प्रस्तावमा प्रमुख प्रतिपक्षी दल नेकपा एमाले सहमत भएको स्रोतको दाबी छ ।
उनले यसमा सहमत हुने हो भने एमालेले पनि सदन चलाउन दिनुपर्ने प्रस्ताव छ । तर सत्तारुढ दल नेपाली काँग्रेस र नेकपा माओवादी केन्द्रले उनको यो प्रस्तावमा सहमति जनाएका छैनन् ।
थापाको नयाँ प्रस्ताव आएसँगै प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्ड र काँग्रेस सभापति शेरबहादुर देउवा अहिले छलफलमा जुटेका छन् । उनीहरु यस विषयमा धारणा बनाउनको लागि अनौपचारिक छलफलमा जुटेका छन् । बैठकमा उपप्रधान एवम् गृहमन्त्री विमलेन्द्र निधिपनि सहभागी छन् ।
