महिला बास्केटबलमा नेपाल उपविजेता
बुधबार राती श्रीलंकामा भएको श्रीलंका–नेपालबीचको खेलमा उपाधि जित्नबाट चुक्यो नेपाल
काठमाडौं–माल्दिभ्समा भइरहेको दोस्रो साबा (दक्षिण एसियाली बास्केटबल संघ) महिला च्याम्पियनसिपमा नेपाल फेरि उपविजेता बनेको छ । श्रीलंकाले लगातार उपाधि जित्दा नेपाल उपविजेता बनेको हो ।
बुधबार भएको आफ्नो अन्तिम खेलमा नेपालले भुटानमाथि सहज जितसहित उपाधि जित्ने सम्भावना कायम राखेको थियो । तर बुधबार राती नै श्रीलंकाले घरेलु टोली माल्दिभ्सलाई ७२–५९ ले हराउँदै च्याम्पियन बन्यो ।
च्याम्पियनसिपमा नेपाल र श्रीलंकाले दुई जित र एक हारबाट समान चार अंक नै जोडेको थियो । तर नेपालभन्दा श्रीलंकाले बढी अंक स्कोर गरेकाले श्रीलंका अघि रहँदै च्याम्पियन बनेको हो । सन् २०१६ मा काठमाडौंमा भएको पहिलो संस्करणमा पनि श्रीलंका सबै खेल जितेर च्याम्पियन बन्दा नेपाल दोस्रो भएको थियो ।
यस पटक भारत सहभागि नहुँदा नेपालले उपाधि जित्ने लक्ष्यसहित माले पुगेको थियो ।नेपालसहित जम्मा चार टिम मात्र सहभागि च्याम्पियनसिप राउन्ड रोविन लिगको आधारमा खेलाइएको थियो । जसमा नेपाल पहिलो खेलमै घरेलु टोली माल्दिभ्ससँग ५१–४७ ले पराजित भयो । तर त्यसपछि नेपालले पुनरागमन गर्दै श्रीलंकालाई ५५–४९ ले हरायो भने लिगको अन्तिम खेलमा भुटानलाई ६५–२६ ले पराजित ग¥यो ।
च्याम्पियनसिपको अन्तिम लिग खेल बिहीबार माल्दिभ्स र भुटानबीच हुनेछ । भुटानले खेलेको दुई खेल हारेको छ । माल्दिभ्सले एक खेल जितेको छ भने एकमा पराजित भएको छ ।
