नेपालले जित्यो केन्याविरुद्धको तीन दिवसीय सिरिज
नेपालले दिएको २३१ रनको विजय लक्ष्य पछ्याएको केन्या ४६.३ बलमा २१३ रनमा अलआउट भएको थियो।
काठमाडौं– केन्या भ्रमणमा रहेको नेपाली क्रिकेट टोलीले तीन दिवसीय क्रिकेट शृंखला एक खेलअघि नै जितेको छ। शनिबार केन्यालाई १७ रनले हराउँदै नेपालले अन्तिम खेलअघि नै शृंखला आफ्ना पक्षमा पारेको हो।
नेपालले दिएको २३१ रनको विजय लक्ष्य पछ्याएको केन्या ४६.३ बलमा २१३ रनमा अल आउट भएको थियो ।
केन्याका रकेप पटेलले ८१ रन बनाए पनि दीपेन्द्र सिंह ऐरीले उनलाई बसिर अहमदबाट क्याचआउट गराएपछि केन्याको इनिंग्स धरमराउन पुग्यो। केन्याका लागि नेलसन ओधिम्बोले २८, कोलिन्स ओबुयाले ३७, नेहमिया ओधिम्बोले १२ रन जोडे ।
केन्याविरुद्ध सोमपाल कामी तीन र दीपेन्द्र सिंह ऐरीले चार विकेट लिए । सोमपालले पहिलो बलमै नेपाललाई सफलता दिलाएका थिए ।
यस्तै दीपेन्द्रले ८१ रन बनाएका रकेपलाई क्याच आउट गराएसँगै नेपाल जितउन्मुख भएको थियो । करण केसी, पवन सर्राफ र आदिल अन्सारीले समान एक विकेट लिए ।
त्यसअघि टस जितेर पहिले ब्याटिङ गरेको नेपालले ४९.२ बलमा सबै विकेट गुमाउँदै २३० रन बनाएको थियो ।नेपालका लागि कप्तान रोहितकुमार पौडेल ७८ रन जोडेसँगै नेपालले केन्यालाई चुनौतीपूर्ण लक्ष्य प्रस्तुत गरेको थियो ।
ओपनर देव खनाल ३७ रनमा आउट हुँदा ज्ञानेन्द्र मल्ल २५, बसिर अहमद १७, आदिल अन्सारीले १४ र सोमपाल कामी २६ रन जोडे । अन्तिम विकेटका लागि करण केसीले ११ रन बनाए ।
पहिलो खेलमा नेपाल ७ विकेटले विजयी भएको थियो । एक दिवसीय शृंखलाको अन्तिम खेल सोमबार हुनेछ । टी २० सिरिज पनि नेपालले नै जितेको छ ।
