राष्ट्रसंघको मानव अधिकार परिषद्मा नेपाल पुनः निर्वाचित

नेपाल संयुक्त राष्ट्रसंघको मानव अधिकार परिषद्को सदस्यमा पुनः निर्वाचित भएको छ ।
परराष्ट्र मन्त्रालयका अनुसार मंगलबार न्युयोर्कमा भएको मतदानमा नेपाल १ सय ५० मत ल्याएर परिषद् सदस्यमा फेरि निर्वाचित भएको हो ।
‘हाम्रा दुवै छिमेकी चीन र भारतसहित १ सय ५० देशको मतले नेपाल परिषद् सदस्यमा फेरि निर्वाचित भएको छ,’ परराष्ट्र सचिव भरतराज पौडेलले भने ।
यसअघि भारतलाई संयुक्त राष्ट्रसंघको सुरक्षा परिषद्को अस्थायी सदस्य बनाउन नेपालले पनि पक्षमा मतदान गरेको थियो ।
नेपालसँगै एसिया प्यासिफिक क्षेत्रबाट चीन र उज्वेकस्तान पनि परिषद् सदस्य चुनिएका छन् । परिषद्मा विभिन्न क्षेत्रबाट ४७ मुलुक सदस्य हुन्छन् । तीमध्ये यसपालि १५ मुलुक नयाँ निर्वाचित भएका हुन् ।
नेपाल सन् २०१८ पनि परिषद् सदस्य निर्वाचित भएको थियो । नेपालले अब सन् २०२३ सम्म परिषद् सदस्यका रूपमा काम गर्नेछ ।
नयाँ निर्वाचित हुने अन्य मुलुकमा अफ्रिकाबाट कोटडिभ्वार, गावोन, मालावी र सेनेगल, पूर्वी युरोपबाट रुस र युक्रेन, दक्षिण अमेरिकाबाट बोलेभिया, क्युबा र मेक्सिको, पश्चिम युरोपबाट फ्रान्स र बेलायत छन् । एसिया प्यासिफिक क्षेत्रबाहेक अन्य मुलुक भने सर्वसम्मत चुनिएका हुन् ।
न्युयोर्कस्थित संयुक्त राष्ट्रसंघका लागि नेपाली स्थायी नियोगका प्रमुख अमृतबहादुर राईले परिषद् सदस्यमा नेपाल पुनः निर्वाचित हुनुले राजनीतिक र मानव अधिकारमा नेपालको प्रगतिशील यात्रालाई अन्तर्राष्ट्रिय समुदायले स्वीकारेको बताए । उनले यो नेपालले देशभित्र र शान्ति मिसनमार्फत संसारका विभिन्न क्षेत्रमा गरेको मानव अधिकारको संरक्षण र संवद्र्धनको मूल्यांकन पनि भएको उल्लेख गरे ।
राईले परिषद् सदस्यको रूपमा फेरि काम गर्न सक्षम ठानेकामा सदस्य राष्ट्रहरूलाई धन्यवाद दिए ।