चितुवाले घरमै बच्चा जन्मायो (फोटो फिचर)

भाद्र २४, २०७३- अनन्तलिंगेश्वर नगरपालिका–८ सिरुटार ढल्यापिपल सोमलिंगेश्वर मन्दिर नजिकै रहेको ललितजंग थापाको घरमा चितुवाले बच्चा जन्माएपछि सिरुटारका स्थानीयबासी त्रसित बनेका छन् ।

भूकम्पले माथिल्लो तला भत्किएपछि खाली भएको थापाको घरको दोस्रो तलामा एक साताअघि आएको चितुवाले तीनवटा बच्चा जन्माएपछि स्थानीय त्रसित बनेका हुन् ।

बच्चा पाएपछि चितुवा समयसमयमा घरबाट ओहोरदोहोर गर्न थालेपछि वरपर हिँड्न नसकिएको घरधनी थापाले बताए । उनले भने, ‘बच्चा घरमै छ । कुन बेला माउ आउँछ पत्तै हुँदैन । त्यसैले वरपर हिँड्न पनि डराइमर्नु भएको छ ।’

उनले खेतबारीमा काम गर्न र बच्चालाई स्कुल पठाउन समेत समस्या भएको बताए । थापाका अनुसार बेलुकीपख चितुवा बाटैमा देखिन्छ ।

स्थानीयवासीले चितुवाका बच्चा देखेपछि प्रहरी र जिल्ला वन कार्यालयलाई खबर गरेका थिए । तर सम्बन्धित निकायले यसबारे कुनै चासो नदेखाएको स्थानीयको गुनासो छ । थापाले भने, ‘हामीलाई दैनिक काम गर्न पनि गाह्रो भइसकेको छ । सम्बन्धित ठाउँमा जानकारी त गरायौं तर खासै सहयोग भएन ।’

थापाका अनुसार तीनवटा बच्चामध्ये एउटा बच्चा चितुवाले लगिसकेको छ । अरु दुइवटा बच्चा पनि चितुवाले नै लैजाने चिडियाखानाका कर्मचारीले बताउँदै आएका छन् ।

आजको कान्तिपुरबाट