आजदेखि लगाइँदै करिब ५७ लाख बालबालिकालाई दादुराविरुद्धको खोप

काठमाडौं– सरकारले आजदेखि दादुरा–रुवेलाविरुद्धको खोप अभियान सञ्चालन गरेको छ। दादुरा रुवेलाको संक्रमणको जोखिमलाई लक्षित गर्दै आगामी चैत ७ सम्म खोप अभियान जारी रहनेछ।
खोप भारतसँग सीमा जोडिएका दादुरा–रुवेलाको अति संक्रमित २१ जिल्ला तथा काठमाडौं उपत्यकाका तीन जिल्ला गरी २४ जिल्लामा ९ महिनादेखि १५ वर्षमुनिका सबै बालबालिकालाई खोप लगाइनेछ।
यस्तै, ५१ जिल्लाका ९ महिनादेखि पाँच वर्षसम्मका बालबालिकालाई पनि खोप लगाइनेछ। खोप बिहान १० देखि दिउँसो ४ बजेसम्म बालबालिकालाई विद्यालय तथा खोप केन्द्रमा खोप लगाइनेछ।
स्वास्थ्य सेवा विभाग, बाल स्वास्थ्य तथा खोप शाखाका प्रमुख डा अभियान गौतमका अनुसार ९ महिनादेखि पाँच वर्षमुनिका २१ लाख ३० हजार ६८३ बालबालिका र पाँच वर्षदेखि १५ वर्षमुनिका ३६ लाख १२ हजार ३१० बालबालिका गरी ५७ लाख ४२ हजार ९९३ बालबालिकालाई खोप लगाइनेछ।

खोप अभियानका लागि देशभरि ४८ हजार ७९८ खोप केन्द्र रहेका छने। यस्तै, ४९ हजार ९३७ जना स्वास्थ्यकर्मी र ५९ हजार ९०६ जना स्वयंसेवक परिचालन गरिनेछ।
उनले खोप सुरक्षित र प्रभावकारी रहेकाले सबैले आ–आफ्ना बालबालिकालाई खोप लगाउन भन्दै उनले खोपले ८५ प्रतिशतलाई दादुरा रुवेला रोगसँग लड्ने क्षमता विकास गर्ने बताए।
उनले खोप लगाएपछि बच्चालाई ज्वरो आउने, रुघाखोकी आउनेजस्ता समस्या देखिए पनि आत्तिनुपर्ने अवस्था नरहेको जनाए। उनले खोप लगाएपछि बच्चामा समस्या हुने भएको जिल्ला स्तरमा आकस्मिक उपचारको टोली गठन गरिएको बताए।
सात रोगविरुद्धको खोप पनि
खोप अभियानकै क्रममा नियमित छुटेका खोप पनि बालबालिकालाई लगाइने उनो भनाइ छ।
खोप अभियानमा सात वटा रोगविरुद्धको खोप पनि सँगै सञ्चालन हुनेछन्। खोप शाखाका प्रमुख डा. गौतमले हेपाटाइटिस बी, धनुष्टंकार, इन्फ्युन्जा, लहरेखोकी, भ्यागुते रोग, निमोनिया र पोलियोविरुद्धको खोप पनि सञ्चालन हुने बताए।
ती खोप लगाउन छुटेका ९ महिनादेखि पाँच वर्षमुनिका बालबालिकालाई लगाइने उनले जानकारी दिए।
सरकारले सन् २०१८ मा दादुरा रुवेलालाई नियन्त्रण गरे पनि निवारण गर्न सकेको छैन। सन् २०२६ सम्म दादुरा–रुवेला निवारण गर्ने लक्ष्यका यसपटक सरकारले खोप अभियान सञ्चालन गर्न थालेको हो।