इपिएस परीक्षा तीन चरणमा हुने कार्यतालिका
काठमाडौं– दक्षिण कोरिया सरकारले रोजगार अनुमति प्रणाली (इपिएस) भाषा परीक्षा तीन चरणमा गर्ने कार्यतालिकासहितको विवरण नेपाललाई पठाएको छ। इपिएसमार्फत कामदार छनोट गर्दै आएको कोरियाली सरकारी निकाय एचआरडी कोरियाले नेपाललाई भाषा परीक्षा तीन चरणमा हुने जानकारी दिँदै पत्र प्रेषित गरेको हो।
उत्पादनमूलक क्षेत्रमा रोजगारीका लागि दक्षिण कोरिया जान भाषा परीक्षा तीन चरणमा हुने भएको हो।वैदेशिक रोजगार विभागका अनुसार पहिलो चरणको परीक्षा जनवरी २० अर्थात् माघ ६ देखि हुनेछ। पहिलो चरणको परीक्षा सकिएलगत्तै दोस्रो र तेस्रो चरणको भाषा परीक्षा हुने जानकारी कोरियाली पक्षले गराएको विभागका महानिर्देशक डण्डुराज घिमिरेले बताए।
कार्यतालिकाअनुसार पहिलो चरणमा ४७ हजार, दोस्रो चरणमा ८० हजार र तेस्रो चरणमा बाँकी ३७ हजार गरी १ लाख ६४ हजारले परीक्षा दिने गरी एचआरडी कोरियाले कार्यतालिका बनाएको उनले जानकारी दिए।
उत्पादनमूलक क्षेत्रका लागि १ लाख ६४ हजार ७१६ जनाले आवेदन दिएका छन्। पहिलो पटक १ लाख ४३ हजार ८१२ जनाले आवेदन दिएका थिए। भने त्यसपछि पानीजहाज निर्माण क्षेत्रमा कामदार माग गरिएका २० हजार ९०४ जनाले आवेदन दिएको इपिएस शाखाले जनाएको छ।
