लुम्बिनीमा आइपुग्यो राष्ट्रिय खेलकुद ट्रफी
१ असोजदेखि प्रदेश राजधानीका साथै मुख्य सहरमा परिक्रमा र प्रदर्शन गर्ने क्रममा २ असोेजमा लुम्बिनी प्रदेशको बुटवल र बुद्ध जन्मभूमि लुम्बिनीमा ट्रफी प्रदर्शन गरिएको हो।
काठमाडौं– राष्ट्रिय खेलकुदको नवौं संस्करणअन्तर्गत निर्माण गरिएको राष्ट्रिय खेलकुद ट्रफी बुद्ध जन्मभूमिमा लुम्बिनीमा प्रदर्शन गरिएको छ ।
राष्ट्रिय खेलकुदमा सहभागी ७ प्रदेश, ३ विभागीय टोली र एनआरएनएमा प्रदर्शन गर्ने उद्देश्यले १ असोजदेखि प्रदेश राजधानीका साथै मुख्य सहरमा परिक्रमा र प्रदर्शन गर्ने क्रममा २ असोेजमा लुम्बिनी प्रदेशको बुटवलका साथै बुद्ध जन्मभूमि लुम्बिनीमा प्रदर्शन गरिएको हो ।
कार्यक्रममा लुम्बिनी प्रदेशका मुख्यमन्त्री कुलबहादुर केसी, ओलम्पियन सुरेन्द्र हमाल, सदस्यसचिव जयप्रकाश भट्टराई, तिलोत्तमा नगरका मेयर रामकृष्ण खाण र प्रदेशसभा सदस्य भुवनेश्वर थारु उपस्थित थिए ।
दक्षिण एसियाली खेलकुदको लगातार ४ संस्करणमा नेपालका लागि ४ स्वर्ण पदकधारी दीपक विष्टको नेतृत्वमा दीपक श्रेष्ठ, भलिबल महिला टिमकी कप्तान अरुणा शाही, क्रिकेटका कप्तान पारस खड्का र अल्ट्रा धावक मीरा राईलगायतको ट्रफी टुर कार्यदलले ट्रफीलाई सातै प्रदेशको राजधानीलगायत मुख्य सहर, विभागीय टोली र एनआरएनएको मुख्य कार्यालयमा भ्रमण गराउने र प्रदर्शन गर्ने कार्यक्रम छ ।
प्रधानमन्त्री शेरबहादुर देउवाले नवौं राष्ट्रिय खेलकुदको रनिङ ट्रफी गत शुक्रबार प्रधानमन्त्री निवास बालुवाटारमा सार्वजनिक गरेका थिए ।
राष्ट्रिय खेलकुद प्रतियोगिताका लागि पहिलो पटक बनाइएको ट्रफीलाई त्यसपछि सात वटै प्रदेशमा लगिँदै छ । ट्रफीलाई २३ असोजमा प्रतियोगिता स्थल गण्डकी प्रदेशको पोखरामा लगिनेछ । नवौं राष्ट्रिय खेलकुद प्रतियोगिता २८ असोजमा पोखरा रंगशालामामा उद्घाटन गर्ने कार्यतालिका छ ।
