नवौं राष्ट्रिय खेलकुदको तयारी तीव्र

काठमाडौं–गण्डकी प्रदेशमा २८ असोजदेखि ३ कात्तिकसम्म आयोजना हुने नवौं राष्ट्रिय खेलकुद प्रतियोगिताको तयारी तीव्र पारिएको छ। नवौं मूल आयोजक समितिले पत्रकार सम्मेलन गरी प्रतियोगिताको तयारीबारे जानकारी दिएको हो।
प्रतियोगिता आउन ५० दिन बाँकी छँदा राष्ट्रिय खेलकुद परिषद् (राखेप) ले गण्डकी प्रदेशका आठ जिल्लामा खेल सञ्चालनका लागि प्रस्ताव गरिएको बताएको छ ।
राखेप सदस्य सचिव टंकलाल घिसिङले एथलेटिक्स, फुटबल, क्रिकेट, पुरुष भलिबललगायत अधिकांश खेल पोखरामा र म्याग्दी, गोरखा, स्याङ्जा, नवलपुर, गोरखा, तनहुँ, लमजुङलगायत जिल्लामा केही खेल सञ्चालन हुने बताए । यसको अन्तिम निर्णय भने प्राविधिक समितिले निरीक्षण र अनुमोदन गरेपछि १५ भदौसम्म हुनेछ ।
प्रतियोगितामा ११ टिमका ७,७९९ खेलाडीको सहभागिता रहनेछ । जसमा पुरुष ४,११४ र महिला ३,६८५ जना महिला खेलाडी सहभागी हुनेछन् । सहभागी खेलाडीले ३९३ स्वर्ण, ३९३ रजत र ६०० कास्य पदकका लागि प्रतिस्पर्धा गर्नेछन् ।
सर्वाधिक पदक जित्ने टिमलाई १० लाख रुपैयाँ बराबरको टिम च्याम्पियन रनिङ ट्रफी प्रदान गरिने बताइएको छ । प्रतियोगिताका लागि ६० करोड रुपैयाँ बजेट सुनिश्चित भइसकेको राखेपले जनाएको छ । जसमा पहिलो किस्ताबापत १० करोड निकासा भइसकेको राखेप सदस्य सचिव घिसिङले बताए ।
प्रतियोगिताका लागि विभिन्न उपसमितिले कार्यविधि तथा कार्यतालिका बनाई काम जारी राखेका छन् । सबै समितिले १५ असोजसम्म सम्पूर्ण काम सकिसक्ने बताइएको छ । प्रतियोगितामा ३६ खेल तथा २ प्रदर्शनी खेल समावेश गरिएको छ ।