५० जिल्लाका बालबालिकालाई लगाइँदै फाइजर खोप
काठमाडौं–स्वास्थ्य मन्त्रालयले आइतबारदेखि ५० जिल्लाका ५ वर्षमाथि र १२ वर्षमुनिका बालबालिकालाई कोभिड–१९ विरुद्धको फाइजर खोप दिन थालिएको बताएको छ ।मन्त्रालयका अनुसार दोस्रो चरणमा ५ भदौदेखि ११ भदौसम्म बालबालिकालाई फाइजरको पहिलो मात्रा दिन लागिएको हो ।यस्तै, २७ भदौदेखि १ असोजसम्म कोभिड–१९ विरुद्धको फाइजरको दोस्रो मात्रा दिइनेछ ।
मन्त्रालयका अनुसार ५० जिल्लामध्ये प्रदेश १ का भोजपुर, धनकुटा, खोटाङ, ओखलढुंगा, पाँचथर, संखुवासभा, सोलुखुम्बु, ताप्लेजुङ, तेह्रथुम, उदयपुरका बालबालिकालाई फाइजर खोप दिइनेछ ।मधेस प्रदेशका बारा, रौतहट र सर्लाही तथा बागमती प्रदेशका रामेछाप, दोलखा, धादिङ, नुवाकोट, रसुवा, सिन्धुपाल्चोकका बालबालिकालाई खोप दिइँदै छ ।
गण्डकी प्रदेशका बाग्लुङ, गोरखा, लमजुङ, मनाङ, मुस्ताङ, म्याग्दी, पर्वत, स्याङजा र तनहुँ तथा लुम्बनी प्रदेशका कपिलवस्तु, अर्घाखाँची, गुल्मी, पाल्पा, प्युठान, रोल्पा, रुकुम पूर्व जिल्लाका बालबालिकालाई पनि कोभिडविरुद्धको खोप दिन लागिएको छ ।
कर्णाली प्रदेशका पश्चिम रुकुम, सल्यान, डोल्पा, हुम्ला, जुम्ला, कालीकोट, मुगु, दैलेख, जाजरकोट तथा सुदूरपश्चिम प्रदेशका अछाम, डोटी, बझाङ, बाजुरा, बैतडी र दार्चुलाका बालिबालिकालाई फाइजर खोप दिइने स्वास्थ्य मन्त्रालयले बताएको छ ।यसअघि सरकारले २७ जिल्लाका बालबालिकालाई फाइजर खोप दिएको थियो ।
