मोबाइल बैंकिङ प्रयोगकर्ताको संख्या १ करोड ८३ लाख पुग्यो

काठमाडौं– राष्ट्र बैंकले मोबाइल बैंकिङ सेवा प्रयोगकर्ताको संख्या १ करोड ८३ लाख नाघेको विवरण सार्वजनिक गरेको छ । आर्थिक वर्ष २०७८÷७९ को जेठ मसान्तसम्म १ करोड ८३ लाख हाराहारी रहेको मोबाइल बैंकिङ प्रयोगकर्ताको संख्या असार मसान्तसम्म ४ लाख बढेर कुल १ करोड ८३ लाख ७ हजार २५५ पुगेको बैंकले बताएको हो ।

असार मसान्तसम्म मोबाइल बैंकिङको माध्यमबाट मात्रै कुल १ खर्ब ६३ अर्ब २५ करोड बराबरको वित्तीय कारोबार भएको बैंकले जनाएको छ । अघिल्लो महिना यस्तो कारोबार १ खर्ब २१ अर्ब ९६ करोड बराबर भएको थियो ।

समीक्षा अवधिमा इन्टरनेट बैंकिङ सेवाग्राहीको संख्या १६ लाख ८४ हजार, डेबिट÷क्रेडिट कार्ड प्रयोगकर्ताको संख्या क्रमशः १ करोड ८ लाख ५६ हजार र २ लाख ३८ हजार, प्रिपेड कार्ड प्रयोगकर्ताको संख्या १ लाख ८ हजार पुगेको विवरण राष्ट्र बैंकले सार्वजनिक गरेको छ ।
भुक्तानीका विभिन्न डिजिटल माध्यममा वालेट प्रयोगकर्ताको संख्या १ करोड ३६ लाख ७५ हजार र कनेक्ट आईपीएस प्रयोगकर्ताको संख्या ८ लाख ९६ हजार पुगेको राष्ट्र बैंकको विवरणमा उल्लेख छ ।