काठमाडौं महानगरले निःशुल्क पिसीआर परीक्षण गर्ने
काठमाडौं महानगरपालिकाले आइतबारदेखि निःशुल्क पिसीआर परीक्षणका लागि स्वाब संकलन गर्ने भएको छ ।
राष्ट्रिय विभूति शंखधर साख्वा र मानव अधिकार अभियान अगुवा पद्मरत्न तुलाधरको शालिक अनावरण कार्यक्रममा नगरप्रमुख विद्यासुन्दर शाक्यले निःशुल्क पिसीआर परीक्षण सुरु गर्न लागिएको जानकारी दिएका हुन् ।
आइतबारदेखि स्वाब संकलन कार्य पुनः सूचारु गर्न लागिएको उनले बताए ।
कन्ट्याक्ट ट्रेसिङमा परेका अशक्त र ज्येष्ठ नागरिकको पिसीआर परीक्षणका लागि स्वाब संकलन गर्न मोबाइल भ्यान सञ्चालन गर्ने तयारीसमेत रहेको नगरप्रमुख शाक्यले जानकारी दिए ।
महानगरले परीक्षणको दायरा फराकिलो बनाउने तयारीका साथ अघि बढेको भन्दै कन्ट्याक्ट ट्रेसिङमा परेका र लक्षण देखिएकालाई मात्र पिसीआर टेस्ट गर्न उनले आग्रह गरे ।
उपत्यकामा पछिल्लो समय बढिरहेको कोरोना संक्रमणको चक्र तोड्न प्रभावकारी कदम चाल्नुपर्ने अवस्था आएको पनि उनको दाबी छ ।
अहिले भीडभाड नियन्त्रण गर्न उपत्यका नगरपालिका फोरमले कोभिड– १९ संकट व्यवस्थापन केन्द्र (सिसिएमसी)लाई सुझाव दिइसकेकाले सरकारको निर्णय कुरेर बसिएको उनले बताए ।
