कोरोना संक्रमितलाई लोकसेवाको परीक्षा दिने व्यवस्था मिलाउन सर्वोच्चको आदेश
सर्वोच्च अदालतले कोरोना संक्रमण पुष्टि भएका व्यक्तिले चाहे परीक्षामा सहभागी गराउन लोकसेवा आयोगको नाममा अन्तरिम आदेश जारी गरेको छ ।
मानव अधिकार रक्षक सञ्जालसँग आबद्ध शैलेन्द्रप्रसाद अम्बेडकरसमेतले दायर गरेको रिटको सुनुवाइ गर्दै न्यायाधीश सपना प्रधान मल्लको इजलासले कोरोना संक्रमितलाई लोकसेवा आयोगको परीक्षामा सहभागी नगराउन आयोगले बनाएको संक्रमणको विशेष अवस्थामा परीक्षा सञ्चालन व्यवस्था मापदण्डको ८ नम्बर बुँदा कार्यान्वनय नगर्न अन्तरिम आदेश दिएको हो ।
कोरोना संक्रमणको डरलाग्दो यो अवस्थामा संक्रमितले परीक्षा दिन नपाउँदा विभेद हुने र नेपालको संविधानमा भएको समानताको हकको पनि उल्लंघन हुने सर्वोच्चले जनाएको छ । यस विषयमा १५ दिनभित्र लिखित जवाफ दिन पनि सर्वोच्चले लोकसेवा आयोगलाई आदेश दिएको छ ।
सर्वोच्चले यो मुद्दाको अन्तिम किनारा नलागेसम्म संक्रमित व्यक्तिलाई परीक्षाबाट नरोक्न र उनीहरूको गोपनीयता भंग नहुने गरी वैकल्पिक व्यवस्थासहित परीक्षाको वातावरण मिलाउन पनि आदेश दिएको छ ।