सक्रिय संक्रमितको संख्या २५ हजार नाघे लकडाउन गर्न सिफारिस

स्वास्थ्य तथा जनसंख्या मन्त्रालयले सक्रिय संक्रमितको संख्या २५ हजार नाघे फेरि लकडाउन गर्न सिफारिस गरेको छ ।
मन्त्रालयको इन्सिडेन्ट कमान्ड सिस्टमको बैठकले २५ हजार बढी सक्रिय संक्रमित भए बन्दाबन्दी गर्नुपर्ने निष्कर्ष निकालेको हो ।
२५ हजारभन्दा बढी संक्रमित भए अस्पतालको पूर्वाधारमा व्यवस्थापन गर्न मुस्किल पर्छ,’ मन्त्रालयका प्रवक्ता प्रा. डा. जागेश्वर गौतमले भने ।
मन्त्रालयको तथ्यांकअनुसार बुधबार देशभर सक्रिय संक्रमितको संख्या १७ हजार ४ सय १४ छ ।
मन्त्रालयले जनस्वास्थ्य मापदण्ड पालना हुन नसक्ने व्यवसाय एक महिना बन्द गर्न पनि सिफारिस गरेको छ ।

१ हजार १ सय ७२ मा कोरोना संक्रमण
पछिल्लो २४ घन्टामा १ हजार १ सय ७२ जनामा कोरोना भाइरस संक्रमण पुष्टि भएको स्वास्थ्य मन्त्रालयले जनाएको छ ।
देशभरका प्रयोगशालामा ९ हजार ४ सय ५९ नमुना परीक्षण गर्दा ४ सय २६ महिला र ७ सय ४६ पुरुषमा संक्रमण पुष्टि भएको हो ।
योसँगै नेपालमा कुल संक्रमितको संख्या ६७ हजार ८ सय ४ पुगेको छ । उनीहरूमध्ये ४ सय ३६ जनाको मृत्यु भएको छ भने ४९ हजार ९ सय ५४ जना संक्रमणमुक्त भएका छन् ।
पछिल्लो २४ घन्टामा मात्र १ हजार ८ सय ९३ जना संक्रमणमुक्त भएको स्वास्थ्य मन्त्रालयले जनाएको छ ।

कहाँ, कति थपिए
मन्त्रालयका अनुसार काठमाडौं उपत्यकामा ६ सय ३७ संक्रमित थपिएका छन् । यीमध्ये काठमाडौंका ४ सय ९२, भक्तपुरका ९५ र ललितपुरका ५० जना छन् ।
यस्तै, रुपन्देहीका ६७, सुर्खेतका ४९, मोरङका ४४, सुनसरीका ३७, बाँकेका ३०, गुल्मीका २८, कास्की र अछामका २२÷२२ जना, सर्लाहीका २१, बर्दियाका १९, डोटीका १७, मकवानपुरका १६, धादिङ र कैलालीका १४÷१४, सप्तरीका १२, सिराहाका ११, काभ्रे र नवलपुरका १०÷१० तथा झापाका ९ जनामा कोरोना संक्रमण पुष्टि भएको छ ।
तनहुँ र कपिलवस्तुमा ६÷६ जना, गोरखा, लम्जुङ, स्याङ्जा र नवलपरासीका ५÷५, बाराका ४, धनुषा र कञ्चनपुरका ३÷३, पाँचथर, रौतहट, नुवाकोट, बाग्लुङ, दाङ, दार्चुला र बैतडीका २÷२ तथा उदयपुर, ताप्लेजुङ, तेह्रथुम, संखुवासभा, महोत्तरी, चितवन, पर्वत, म्याग्दी र बझाङका १÷१ जनामा संक्रमण देखिएको मन्त्रालयले जनाएको छ ।