ओहोदाको प्रमाणपत्र प्रस्तुत
काठमाडौँ, ५ माघ । जाम्बियाका लागि गैरआवासीय नेपाली राजदूत अमृतबहादुर राईले आज त्यहाँका राष्ट्रपति इडगर चाग्वा लुङ्गुसमक्ष आफ्नो ओहोदाको प्रमाणपत्र प्रस्तुत गर्नुभएको छ ।
जाम्बियाको राजधानी लुसाकास्थित राष्ट्रपति भवनमा आयोजित समारोहमा उहाँले सो प्रमाणपत्र प्रस्तुत गर्नुभएको हो । सो अवसरमा राजदूत राईले राष्ट्रपति विद्यादेवी भण्डारी र प्रधानमन्त्री पुष्पकमल दाहाल‘प्रचण्ड’ ले नेपाली जनताका तर्फबाट त्यहाँका राष्ट्रपति र जनतालाई सुख र समृद्धिका लागि पठाउनुभएको सन्देश अवगत गराउनुभएको थियो । राष्ट्रपति लुङ्गुले नेपालले नयाँ संविधान जारी गरेकामा बधाई दिनाका साथै द्विपक्षीय सम्बन्ध सुधारमा जोड दिनुभएको दक्षिण अफ्रिकाको प्रिटोरियास्थित नेपाली राजदूतावासले जनाएको छ ।
राजदूत राईले दुवै मुलुक अति विकासोन्मुख भएका सन्दर्भमा विश्व आर्थिक बजारमा अन्तर्राष्ट्रिय समुदायमा सहकार्यका साथ प्रस्तुत हुनुपर्ने बताउँदै त्यसमा जाम्बियाको सकारात्मक साथ रहने अपेक्षा व्यक्त गर्नुभयो ।
