सबैको योगदानबाट मात्रै समाज रुपान्तरण गर्न सकिन्छ
पोखरा, २९ पुस । मुख्यसचिव डा सोमलाल सुवेदीले सबैको योगदानबाट मात्रै समाज रुपान्तरण गर्न सकिने बताउनुभएको छ ।
लेखनाथ नगरपालिका–१ भण्डारढिकमा सञ्चालित जनप्रकाश बहुमुखी क्याम्पसको नवनिर्मित भवनको आज उद्घाटन गर्दै विकास निर्माणमा स्थानीय जनताको होस्टेमा हैँसे गर्न सरकार तयार रहेको बताउनुभयो ।
अधिराज्यका स्थानीय तहबाट वार्षिक एक लाखभन्दा बढी नयाँ योजनाका लागि बजेट माग हुने गरेको बताउँदै उहाँले सामुदायिक क्याम्पस र विद्यालयमा हुने लगानीअनुसारको प्रतिफल आउन नसकेको गुनासो गर्नुभयो ।
स्थानीय विकास मन्त्रालय, विश्वविद्यालय अनुदान आयोग, पूर्वाधार क्षेत्र विकास कोष, लेखनाथ नगरपालिका र क्याम्पसको आन्तरिक स्रोत परिचालन गरी कुल रु एक करोड ४८ लाखको लागतमा १२ कोठे भवन निर्माण गरिएको हो ।
क्याम्पस सञ्चालक समितिका अध्यक्ष कृष्णहरि भण्डारीको अध्यक्षतामा भएको सो कार्यक्रममा पोखरा उद्योग वाणिज्य सङ्घका पूर्वअध्यक्ष बाबुराम गिरी र जीवन ज्ञवालीलगायतका वक्ताले बोल्नुभएको थियो ।
भवन निर्माण गर्न सहयोग गर्ने समाजसेवी हिरामणि भण्डारी, कमल गुरुङ र रामबहादुर भण्डारीलाई सम्मान गरिएको थियो । रासस
