सहकारीको बचत रकम संरक्षण गर्न सरकार प्रतिबद्ध – मन्त्री थामी
काठमाडौँ, १७ पुस । विसं २०१३ मा नेपालमा सुरु भएको सहकारी अभियान ग्रामीण समुदायको संलग्नता कारण विस्तार हुँदैगएको छ ।
राष्ट्रिय सहकारी सङ्घ लिमिटेडको २४ औँ वार्षिकोत्सवको अवसरमा आज यहाँ आयोजित कार्यक्रममा ३२ हजार २७४ सहकारी संस्थामा संलग्न व्यक्तिको सङ्ख्या ६७ लाख ५४ हजार २७३ जना पुगेको जानकारी दिइयो । यसमा महिलाको आवद्धता ५० प्रतिशतभन्दा माथि छ । यस क्षेत्रमा हालसम्म रु ९४ अर्ब ९८ करोड २४ लाख सेयर पँुजी लगानी भएको छ भने रु दुई खर्ब ३१ अर्ब बचत रहेको छ ।
कार्यक्रमको उद्घाटन गर्दै गरिबी निवारण तथा सहकारी मन्त्री हृदयराम थामीले सरकारी र निजी बैँक नपुगेको दुर्गम क्षेत्रमा सहकारी पुगेकाले गाउँ गाउँमा आर्थिक गतिविधि तीव्र भएको बताउनुभयो ।
उहाँले टीका लगाउँदा पाएको दाम, बाख्रा बेचेको पैसा, दूघ बेचेको पैसा जम्मा गरी सङ्कलन भएको सहकारीको बचत कुनै पनि हालतमा दुरुपयोग हुन नहुने र त्यस्ता बचत रकम संरक्षण गर्न सरकार प्रतिबद्ध रहेको बताउनुभयो ।
मन्त्री थामीले सहकारीलाई खुम्चाउने वा नियन्त्रण गर्ने सरकारको कुनै सोचाइ नभएको पनि प्रस्ट पार्नुभयो ।
मन्त्रालयका सचिव मोहनकृष्ण सापकोटाले सहकारीको आन्दोलन सङ्ख्यात्मक रुपमा उकालो लागेपनि गुणात्मक सुधार गर्नुपर्ने चुनौती विद्यमान रहेको बताउनुभयो ।
राष्ट्रिय सहकारी सङ्घ लिमिटेडका अध्यक्ष केशव बडालले प्रतिवेदन प्रस्तुत गर्दै सहकारी क्षेत्रमा जनताको आकर्षण बढ्दै गएकाले यसको भविष्य उज्ज्वल रहेको बताउनुभयो ।
सहकारी संस्थाले ५३ लाख व्यक्तिलाई अप्रत्यक्ष रोजगारी दिएको बताइएको छ । रासस
