काठमाडौँ तराई÷मधेस द्रुतमार्ग निर्माण अध्ययन सुरु

काठमाडौँ, १४ पुस । काठमाडौँ–तराई÷मधेस द्रुतमार्ग सडक आयोजना निर्माण सरकारीस्तरमा अगाडि बढाउन राष्ट्रिय योजना आयोगले अध्ययन सुरु गरेको छ ।

सरकारले यही पुस ७ गते निर्णय गरेर काठमाडौँ तराई÷मधेस द्रुत मार्गलाई अगाडि बढाउने सन्दर्भमा अध्ययन गरेर एक महिनाभित्र प्रतिवेदन बुझाउन आयोगलाई अख्तियारी दिएको थियो । आयोगका उपाध्यक्ष डा मीनबहादुर श्रेष्ठको संयोजकत्वमा बनेको समितिले आयोजनाको विस्तृत परियोजना प्रतिवेदन अध्ययन सुरु गरेको हो ।

समितिको आजको बैठकले आइतबार प्रतिवेदन प्रस्तुति हेर्ने र स्थलगत निरीक्षण गरेर संशोधनका लागि सरकारलाई सिफारिस गर्ने निर्णय गरेको छ । अध्ययनपछि सरकारले आफँैले आयोजना निर्माण गर्दा कुन ढाँचामा लगानी जुटाउने र सरकारी खरिद कस्तो हुने भन्ने सन्दर्भमा अध्ययन गरेर सुझाव पेस गर्नेछ ।

आयोगका उपाध्यक्ष डा श्रेष्ठले सरकारले दिएको पहिलो कार्यादेशमध्ये प्रतिवेदन अध्ययन सुरु गरिएको जानकारी दिनुभयोे । उहाँका अनुसार हालको प्रतिवेदनको प्रस्तुतिपछि स्थलगत निरीक्षण गरिने र त्यसपछि संशोधन गर्नुपर्ने विषयमा निक्र्योल गरिनेछ । समितिले आइतबार प्रस्तुतिका लागि आयोजनालाई बोलाएको छ । पाँच वर्षमा सक्ने लक्ष्य राखिएको उक्त आयोजनाअन्तर्गत ७६ किमीको सडक निर्माण गर्न रु एक खर्ब १२ अर्ब लागत लाग्ने छ ।
समितिमा आयोगका सदस्य प्रा हिरेन्द्रमान प्रधान, कानुन, अर्थ, र भौतिक पूर्वाधार तथा यातायात मन्त्रालयका सचिव क्रमशः टेकप्रसाद ढुङ्गाना, शान्तराज सुवेदी र धनबहादुर तामाङ, सडक विभागका महानिर्देशक देवेन्द्र कार्की तथा सदस्य सचिवमा आयोजना प्रमुख शतेन्द्र शाक्य रहनुभएको छ । रासस