कोरियाको पानी जहाजमा काम गर्ने नेपालीद्वारा महावीरको आविष्कार केन्द्रलाई सहयोग
कार्तिक ३०, २०७३- दक्षिण कोरियामा रहेका नेपालीहरुले महावीर पुनद्धारा खोल्न लाग्को राष्ट्रिय आविष्कार केन्द्रलाई १ लाख ६५ हजार रुपैयाँ सहयोग गरेका छन् । गजेदोस्थित पानीजहाज निर्माण कम्पनी डेउ सिपबिल्डिङ मेरिन एण्ड इन्जिनियरिङ कम्पनीमा कार्यरत नेपालीहरुको संस्था डेउ नेपाली एकता समाजको पहलमा सो रकम संकलन गरिएको हो ।
समाजका उपाध्यक्ष केशव खड्का लगायतका प्रतिनिधिले सोमबार आविष्कार केन्द्रको कार्यालय ठमेलमा केन्द्रका संचालक पुनलाई हस्तान्तरण गरेका थिए । पुनले एकता समाज परिवारलाई सहयोग बापत धन्यवाद व्यक्त गरेका थिए । सो रकम संकलन गर्न गत शनिवार गजेदोमा नेपाली चलचित्र छक्का पञ्जा प्रदर्शन गरिएको थियो ।
करिब ८०० जना नेपालीहरु कार्यरत सो कम्पनीमा चलचित्र हेर्न र पुनको अभियानमा सहयोग गर्नेको उल्लेख्य रुपमा उपस्थिति रहेको गंगा फूयालले बताए । केन्द्रको अभियानमा सहयोग गर्न पाउदा खुसी लागेको र निरन्तर सहयोग गरिने समाजका अध्यक्ष मोहन पंडितको भनाई थियो ।आजको कान्तिपुरमा खबर छ ।
