प्रमुख समाचार
Saturday, 2 Apr, 2016
राजनीतिलाई व्यवसाय बनाएकाले मुलुकमा भ्रष्टाचार बढेको हो: भट्टराई
पूर्व प्रधानमन्त्री तथा नयाँ शक्ति अभियानका संयोजक डा बाबुराम भट्टराईले राजनीतिलाई व्यवसाय बनाउन नहुनेमा जोड दिएका छन्।उद्योग वाणिज्य सङ्घ चितवनले जिल्लाको नारायणगढमा शनिवार आयोजना गरेको कार्यक्रममा भट्टराईले राजनीतिलाई व्यवसाय नबनाई व्यवसाय गरेर राजनीति गर्नुपर्ने सुझाव दिए। राजनीतिलाई व्यवसाय बनाएका कारण नै भ्रष्टाचार बढेको उनको जिकिर थियो।
‘कार्यकर्तालाई विभिन्न ढङ्गले उत्पादन र व्यवसायमा जोड्नुपर्छ, पूर्व अर्थमन्त्रीसमेत रहेका भट्टराईले भने, राजनीतिलाई नितान्त स्वयमसेवी सेवा बनाउनुपर्छ।’
उनले आफूले यसलाई कार्यनीति नै बनाएर अभियान अघि बढाइएको जानकारी दिए। कुनै राजनीतिक नेता दोषी ठहर भए पार्टीले निष्कासित हुने व्यवस्था गर्नसके प्रभावकारी हुने तर्क उनको थियो।
उद्योग वाणिज्य सङ्घ चितवनले भट्टराईसँग उद्योग व्यवसायको प्रवद्र्धन एवम् मुलुकको आर्थिक समृद्धिका विषयमा छलफल गरेको थियो। छलफलमा जिल्लाका व्यवसायीको सहभागिता थियो।
तराईको समस्याका विषयमा तपाईको ढुलमुले व्यवहारजस्तो देखिएको छ नि भन्ने व्यवसायीको प्रश्नमा उनले विविधतालाई सम्बोधन गर्ने गरी आधुनिक युगको मूल्यमान्यतालाई आत्मसात् गर्नुपर्नेमा जोड दिए।
उनले वैदेशिक सम्बन्धका विषयमा उल्लेख गर्दै भारत, चीनले सामरिक स्वार्थ राख्ने गरेको प्रष्ट्याए।अान्तरिक झगडा हुँदा छिमेकी देशले फाइदा खोज्ने भएकाले आफ्नो समस्या आफैँले हल गर्नुपर्ने उनको तर्क थियो। दुईवटै छिमेकीसँग सन्तुलित सम्बन्ध नेपालले राख्नुपर्ने उनको भनाइ थियो। रासस
