आठबीसकोट बाढीः पुरिएका तीन बालिकाको शव निकालियो

काठमाडौं–रुकुम पश्चिममा गएराती आएको बाढीले घर बगाउँदा पुरिएका तीन बालिकाको शव निकालिएको छ। आठबिसकोट नगरपालिका–१२ को झिन्चौर बगरमा झिन्चौर खोलामा आएको बाढीले घर बगाउँदा तीन बालिका पुरिएका थिए। बाढीले घर बगाउँदा पुरिएर मृत्यु भएका १० वर्षीया हितमाया पुन, आठ वर्षीया धनसा पुन र चार वर्षीया मनिषा सार्कीको शव निकालिएको आठबीसकोट नगरपालिका प्रमुख रवि केसीले जानकारी दिए।
उनका अनुसार बाढीले घर बगाउँदा बेपत्ता भएका ४० वर्षीय डिल्लीबहादुर बुढाथोकीको खोजी भइरहेको छ। उनी बसेको घरमै पुरिएको हुन सक्ने आशंका गरिएको छ। लेदोसहितको बाढीले घर पुरिएपछि डोजर लगाएर लेदो हटाउने तयारी भइरहेको नगरप्रमुख केसीले बताए।
बाढीमा परेर घाइते भएका सात जनाको आठबिसकोट नगर अस्पतालमा उपचार भइरहेको छ। स्थानीय १२ वर्षीय विनय सार्की, २२ वर्षीया मनिषा पुन, २९ वर्षीय जनक खत्री, ६ वर्षीया मनसरी पुन, चार वर्षीय मेक्सन पुन, २८ वर्षीया धनमाया पुन र ६५ वर्षीया कल्पना कामी घाइते भएका छन्।
पहिरोमा परेकाको पूर्ण विवरण संकलन जारी रहेको र घटनास्थलमा सुरक्षाकर्मी, स्थानीयलगायतले बेपत्ता खोजी गरिरहेको नगरप्रमुख केसीले बताए।