कांग्रेस नेताहरूमा कोरोना देखिएपछि मुख्यालय बन्द

नेपाली कांग्रेसले सानेपास्थित केन्द्रीय कार्यालय आइतबारदेखि पाँच दिनका लागि बन्द गरेको छ । असोज १५ मा केन्द्रीय सदस्यलगायत दुई सय ५० जनाको स्वाब परीक्षणका लागि टेकुस्थित ल्याबमा पठाइएकोमा पाँच जना केन्द्रीय सदस्यको रिपोर्ट शनिबार पोजेटिभ आएको थियो ।
मुख्यसचिव कृष्णप्रसाद पौडेलले असोज २२ सम्म कार्यालय बन्द गर्ने निर्णय भएको बताए ।
केन्द्रीय सदस्य अर्जुननरसिंह केसी, गगन थापा, आमन्त्रित केन्द्रीय सदस्य शम्भुलाल श्रेष्ठ, कल्पना चौधरीलगायतमा कोरोना संक्रमण देखिएको हो ।
कांग्रेसले केन्द्रीय सदस्य, नेताका स्वकीय सचिव, केन्द्रीय कार्यालयका कर्मचारी र नेताका सुरक्षामा खटिएका सुरक्षाकर्मीलगायत गरी २ सय ५० जनाको स्वाब परीक्षण गर्न टेकुस्थित प्रयोगशालामा पठाएको थियो ।
करिब १ सय ६० जनाको रिपोर्ट अझै आउन बाँकी छ ।
कांग्रेसले सोमबार बस्ने केन्द्रीय समिति बैठकका लागि केन्द्रीय सदस्यको पिसिआर परीक्षण गराएको थियो । अब केन्द्रीय समिति बैठक पनि अन्योलमा परेको छ ।
आइतबार बिहान ९ बजेका लागि बोलाइएको पदाधिकारी तथा पूर्वपदाधिकारीको अनौपचारिक बैठक भने स्थगित गरेको प्रवक्ता विश्वप्रकाश शर्माले बताए ।

न्यायाधीशलाई कोरोना संक्रमण
सर्वाेच्च अदालतका केही न्यायाधीश र कर्मचारीलाई कोरोना संक्रमण भएपछि आइतबार सर्वाेच्च अदालतको काम प्रभावित भएको छ ।
न्यायाधीश मनोजकुमार शर्माको एकल इजलासका लागि मात्र पेशी तोकिएको छ । शर्माले ९ वटा रिट र २ वटा अदालतको अवहेलना मुद्दा हेर्दै छन् । सामान्य अवस्थामा सातभन्दा बढी इलजास सञ्चालन हुने सर्वोच्चमा न्यायाधीशलाई कोरोना संक्रमण भएसँगै इजलास संख्या एउटामा झरेको हो ।
सर्वाेच्चले कति न्यायाधीश र कर्मचारी संक्रमित भएको जानकारी भने दिएको छैन । उसले सूचना जारी गरेर केही न्यायाधीश र कर्मचारीमा संक्रमण देखिएको जानकारी दिएको हो ।