पूर्व राष्ट्रपति भण्डारी स्वदेश फिर्ता
पूर्व राष्ट्रपति विद्यादेवी भण्डारी चीन भ्रमण पूरा गरी सोमवार स्वदेश फिर्ता हुनुभएको छ ।
उहाँ सोमवार बिहान त्रिभुवन अन्तर्राष्ट्रिय विमानस्थल हुँदै स्वदेश फर्किनुभएको हो । उहाँ जेठ १ गते नेपाली प्रतिनिधि मण्डलको नेतृत्व गर्दै चीन भ्रमणमा जानुभएको थियो । उहाँसँगै नेकपा (एमाले) विदेश विभाग प्रमुख रघुवीर महासेठ, उद्योग मन्त्री दामोदर भण्डारी लगायत रहनुभएको थियो ।
पूर्व राष्ट्रपति भण्डारीको चीन भ्रमण फलदायी र उपलब्धिमूलक रहेको उद्योग, वाणिज्य तथा आपूर्ति मन्त्री दामोदर भण्डारीले बताउनु भयो । मन्त्री भण्डारीका अनुसार भ्रमणका क्रममा पूर्व राष्ट्रपति भण्डारीले चिनियाँ उपराष्ट्रपति हान चेङ, सीपीसीका विदेश विभाग प्रमुख लिउ जियानचाओ लगायत उच्चपदस्थ अधिकारीहरूसँग भेटवार्ता गर्नुभएको थियो । भ्रमणका क्रममा चीन–नेपालबिचको द्विपक्षीय सहयोग आदानप्रदान, संस्कृति सम्बन्ध, अर्थ कूटनीति लगायतका विषयमा छलफल भएको मन्त्री भण्डारीले बताउनु भयो । उहाँले चीन–नेपालबिचमा विगतमा भएका समझदारी एवं सम्झौता कार्यान्वयनका विषयमा पनि छलफल भएको तथा चिनियाँ पक्षले विगतमा भएका समझदारी कार्यान्वयनका लागि प्रतिबद्धता व्यक्त गर्नुभयो जानकारी दिनुभयो ।
