Exclusive News
Sunday, 7 Feb, 2021
पत्रकारसहित १९ हजारलाई लगाइँदै कोरोना खोप
सरकारले पत्रकार र कूटनीतिक नियोगका कर्मचारीलाई कोरोना भाइरसविरुद्धको खोप लगाउने भएको छ ।
स्वास्थ्य सेवा विभागअन्तर्गतको खोप शाखा प्रमुख डा. झलक शर्मा गौतमका अनुसार पत्रकार, कूटनीतिक नियोग र सयुक्त राष्ट्रसंघका कर्मचारी गरी झन्डै १९ हजारलाई सोमबारदेखि खोप दिने तयारी भएको छ ।
त्यसका लागि उपत्यकाका चार वटा अस्पताल तोकिएको छ । डा. गौतमका अनुसार पत्रकारले सिभिल अस्पताल, कूटनीतिक नियोगका कर्मचारीका लागि गंगालाल हृदयरोग अस्पताल र टिचिङ अस्पताल अनि संयुक्त राष्ट्रसंघका कर्मचारीका लागि पाटन अस्पतालमा खोप लगाइनेछ ।
शनिबार सम्पन्न पहिलो चरणको खोप अभियानमा १ लाख ८४ हजार ८५७ जनाले खोप लगाएको सरकारी तथ्यांक छ ।
स्वास्थ्यकर्मी, एम्बुलेन्स चालक, शव व्यवस्थापनमा खटिएका कर्मचारी, कैदी, सरसफाइ कर्मचारीले पहिलो चरणको खोप लगाएका छन् ।
