कोभिड–१९ व्यवस्थापन समितिले भन्यो– उपत्यकामा कोरोनाको जोखिम उच्च

काठमाडौं उपत्यकामा कोरोना संक्रमणको जोखिम उच्च रहेको कोभिड–१९ संकट व्यवस्थापन समिति (सीसीएमसी) ले निष्कर्ष निकालेको छ । उपत्यका नगरपालिका फोरमले माग गरेजस्तो निषेधाज्ञा भने नलगाइने उसले बताएको छ ।
सीसीएमसी निर्देशक समितिको मंगलबार बसेको बैठकमा संक्रमणको पछिल्ल्लो अवस्थाबारे छलफल भएको थियो । सीसीएमसीका सचिव महेन्द्र गुरागाईंका अनुसार कतिपय जिल्लामा संक्रमण न्यून भए पनि उपत्यकामा उच्च जोखिम रहेको विश्लेषण छ ।
तर, मेयर फोरमले माग गरेजस्तो उपत्यकाभर निषेधाज्ञा भने नलगाइने उनले प्रस्ट पारे ।
काठमाडौं महानगरपालिकाका मेयर विद्यासुन्दर शाक्यका अनुसार परीक्षणको दायरा भने बढ्नेछ । दसैं–तिहारलगायतका चाडपर्वका कारण पनि परीक्षणको दायरा कम भएकाले संक्रमितको संख्या कम देखिएको हुन सक्ने उनले बताए ।
मंगलबारबाट कक्षा १२ को परीक्षा पनि सुरु भएको छ । कलेजहरुले कक्षा ११ को परीक्षा पनि गर्दै छन् ।
लामो समयदेखि घरमा रहेका विद्यार्थीहरु परीक्षाका कारण बाहिर निस्किने भएकाले यसले पनि के असर गर्छ, त्यसलाई पनि हेरिनुपर्ने उनले बताए । शाक्यले भने, परीक्षा अवधि सकिएपछि असरको समीक्षा गर्ने र विद्यालयहरु खोल्ने कि नखोल्नेबारे निर्णय गर्ने भन्ने भएको छ ।’

आवश्यक प¥यो भने संक्रमित धेरै भेटिएका क्षेत्र सिल गर्ने, तर सिंगो काठमाडौं उपत्यकामा तत्काल निषेधाज्ञा जारी नगर्न सबै सहमत भएको मेयर शाक्यले सुनाए ।

बैठकमा उच्च र न्यून जोखिम भएका क्षेत्रहरुमा कुन–कुन क्षेत्र खुला गर्ने र कुन–कुन बन्द गर्ने भन्ने छलफल भएको थियो ।
‘संक्रमण न्यून भएका जिल्लाहरुमा बन्द भएका सेवा विस्तारै खोल्दै जान सकिन्छ,’ गुरागाईंले भने ।
काठमाडौं उपत्यकाको एकीकृत एम्बुलेन्स सेवाका एम्बुलेन्स काठमाडौं महानगरलगायतका स्थानीय तहमा पार्किङको व्यवस्था मिलाउने निर्णय पनि बैठकले गरेको छ ।
एकाध कर्मचारी वा पदाधिकारीमा कोरोना संक्रमण पुष्टि हुनासाथ सम्पूर्ण सेवा नै बन्द नगर्न निर्देशन दिइएको छ ।