२४ घन्टामा ११ सयभन्दा बढीमा कोरोना संक्रमण

नेपालमा पछिल्लो २४ घन्टामा थप १ हजार १२० जनामा कोरोना संक्रमण देखिएको छ ।
देशका विभिन्न प्रयोगशालामा गरिएको परीक्षणका क्रममा यी व्यक्तिमा कोरोना भाइरसको संक्रमण पोजेटिभ देखिएको स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले जनाएका हुन् ।
योसहित नेपालमा कोरोना संक्रमित हुनेको संख्या ४१ हजार ६४९ पुगेको छ । पछिल्लो २४ घन्टामा काठमाडौं उपत्यकामा ३८८ जना कोरोना संक्रिमत थपिएका छन् । योसँगै उपत्यकामा कोरोना भाइरसबाट संक्रमित हुनेको संख्या ६ हजार ५ सय ९४ पुगेको प्रवक्ता डा जागेश्वर गौतमले बताए ।
हाल देशभर १८ हजार १०८ जना सक्रिय संक्रमित छन् भने १० हजार ४९३ संस्थागत आइसोलेसनमा छन् । होम आइसोलेसनमा रहने संक्रमितको संख्या ७ हजार ६ सय १५ छन् ।

उपत्यकामा कर्फ्यु लगाउन मेयरहरूको सुझाव

उपत्यका नगरपालिका फोरमले काठमाडौं उपत्यकामा कर्फ्यु लगाउन सरकारलाई सिफारिस गरेको छ । उपत्यका फोरमको बुधबार भएको भर्चुअल बैठकले उपत्यकाका तीन जिल्लामा निषेधाज्ञाले मात्रै कोरोना संक्रमणको चेन ब्रेक नहुने देखिएकाले कर्फ्युसम्म लगाउनुपर्ने निष्कर्ष निकालेको हो ।
यसका लागि तीनै जिल्लाका प्रमुख जिल्ला अधिकारीहरूलाई सुझावसमेत दिएको उपत्यका नगरपालिका फोरमका सचिव समेत रहेका मध्यपुर नगरपालिकाका मेयर मदन सुन्दर श्रेष्ठले बताए ।
‘निषेधाज्ञाले मात्रै नियन्त्रण हुन सकेन । निषेधाज्ञाको माथिल्लो तहमा लैजाने भनेको कर्फ्यु नै हो । बिहान ९ बजेसम्म किनमेल गर्न पाइने भनेका कारण मान्छेहरू मर्निङ वाक र इभिनिङ वाकसमेत गर्न थालेका छन्,’ श्रेष्ठ भन्छन्, ‘संक्रमणको दर बढ्दै गएको छ । संक्रमितहरू सबैलाई आइसोलेसनमा राख्न सकिएको छैन । संक्रमणको दर घटाउनका लागि कप्mर्यु अनिवार्य देखियो ।
कर्फ्यु लागेपछि मान्छे हिँडडुल गर्न डराउने र कारबाहीसमेत गर्न मिल्ने भएकाले छोटो अवधिका लागि यस्तो गर्न जरुरी रहेको उनको तर्क छ । ‘केही समय किनमेलका लागि दिएर १ साता कर्फ्यु लगाउनुपर्छ भन्ने हो । यो अवधिमा सबै कन्ट्याक्ट ट्रेसिङसहित परीक्षणको दायरामा पनि ल्याएर आइसोलेट गर्न सकिन्छ,’ उनले भने ।
उपत्यकाका १८ वटै नगरपालिका प्रमुख÷उपप्रमुखहरूसँग विभिन्न माध्यमले कुराकानी भएर यस्तो सुझाव दिइएको उनले बताए । काठमाडौं उपत्यकामा दुई साताको निषेधाज्ञा आजदेखि सकिएको छ ।