कोशीमा आफ्नै नेतृत्वमा सरकार बनाउने कांग्रेस निर्णय
काठमाडौं–सत्तारुढ कांग्रेसले कोशी प्रदेशमा फेरि आफ्नै नेतृत्वमा सरकार गठनका लागि पहल थाल्ने निर्णय गरेको छ।आज बिहान सभापति शेरबहादुर देउवा निवास धुम्बाराहीमा बसेको कांग्रेस पदाधिकारी बैठकमा कोशी सरकार निर्माणका लागि पार्टीले छलफल चलाउने निर्णय गरेको हो।
पदाधिकारी बैठकमा सभापति देउवाले पुनः कांग्रेसकै नेतृत्वमा कोशीमा गठबन्धन सरकार बनाउनुपर्ने धारणा राखेका थिए। उनले भने, ‘अहिलेको गठबन्धनलाई कायम राख्दै थप दलहरूको समर्थन खोजेर कोशीमा कांग्रेसकै नेतृत्वमा सरकार गठन गर्ने हो। त्यसका लागि मैले छलफल गर्छु।’
कांग्रेसले कोशीमा राष्ट्रिय प्रजातन्त्र पार्टीलाई सरकारमा सहभागी गराउन अध्यक्ष राजेन्द्र लिङ्देनसँग छलफल चलाउने विषयमा बैठकमा छलफल भएको महामन्त्री विश्वप्रकाश शर्माले बताए छ।केही दिनअघि बसेको राप्रपा केन्द्रीय कार्यसम्पादन समिति बैठकले कोशीको निर्णय लिने अन्तिम अधिकार अध्यक्ष लिङ्देनलाई दिएको थियो।बैठकमा देउवाले प्रधानमन्त्री पुष्पकमल दाहाल प्रचण्डलगायत गठबन्धन दलका अन्य नेतालाई पनि भेटेर कोशीमा कांग्रेस नेतृत्वमै सरकार बनाउन सहयोग माग्ने बताए।
सर्वोच्च अदालतको परमादेशसँगै मुख्यमन्त्री नियुक्त भएका एमाले नेता हिक्मत कार्कीले बहुमत जुटाउन नसकेपछि २० असोजमा पदबाट राजीनामा दिएसँगै प्रदेश प्रमुख परशुराम खापुङले २६ असोजभित्र सरकार गठनका लागि समय दिएका छन्।कांग्रेस संसदीय दलका नेता उद्धव थापा दुई पटक र एमाले संसदीय दलका नेता हिक्मत कार्की पनि दुई पटक कोशीको मुख्यमन्त्री भइसकेका छन्।
कोशीमा ९ महिनामा चार पटक सरकार गठन, विघटन भइसकेको छ भने अब पाँचौं पटक सरकार गठनको पहल भइरहेको हो।
‘पदाधिकारी बैठकमा कोशीमा सरकार गठनका विषयमा पनि छलफल भयो। कांग्रेस नेतृत्वमा गठबन्धन सरकार बनाउन पहल गर्ने कुरा सभापति देउवाजीबाट व्यक्त भएको छ’, कांग्रेस प्रचार विभाग प्रमुख मीनबहादुर विश्वकर्माले भने।
पदाधिकारी बैठकमा इजरायल घटनाबारे परराष्ट्रमन्त्री एनपी साउदले बिफ्रिङ गरेका थिए।
