अन्तर्राष्ट्रिय सम्बन्ध समिति बैठकमा प्रधानमन्त्री अनुपस्थित
प्रधानमन्त्री शेरबहादुर देउवा प्रतिनिधि सभाको अन्तर्राष्ट्रिय सम्बन्ध समितिको बैठकमा अनुपस्थित भएका छन् ।
अमेरिकाबाट प्रस्तावित स्टेट पार्टनरसिप प्रोग्राम (एसपीपी) बारे छलफल गर्न समितिले रक्षामन्त्रालयको समेत जिम्मेवारी सम्हालेका प्रधानमन्त्री देउवालाई आजको बैठकमा बोलाएको थियो ।तर प्रधानमन्त्रीको सचिवालयले आउन नभ्याउने भनी जानकारी गराएको समिति सभापति पबित्रा निरौला खरेलले जानकारी दिइन् । प्रधानमन्त्रीले समितिलाई अपमान गरेको महसुस आफूले गरेको पनि खरेलले बताइन् ।
अमेरिकासँग ‘स्टेट पार्टनरशीप प्रोग्राम’ (एसपीपी)का बारेमा छलफलका लागि प्रधानमन्त्री देउवालाई बोलाइएको थियो । समितिको यसअघि बसेको दुई वटा बैठकमा यस विषयमा छलफल भइसकेको छ । प्रधानमन्त्री देउवालाई छलफलका लागि असार ५ गते बोलाउने निर्णय समितिले यसअघि नै गरेको थियो । प्रतिनिधिसभा बैठकमा पनि एसपीपीका बारेमा सांसदहरुले प्रश्न उठाएका छन् । रक्षा मन्त्रालयको समेत जिम्मेवारी सम्हालेका प्रधानमन्त्री देउवाले प्रतिनिधिसभा र संसदीय समितिमा यसबारे अहिलेसम्म आफ्नो धारणा राखेका छैनन् ।