कांग्रेस सांसद पाण्डेले लिए शपथ
नेपाली कांग्रेसका नेता मोहनप्रसाद पाण्डेले संघीय संसद् प्रतिनिधिसभा सदस्यका रुपमा पद तथा गोपनीयताको शपथ लिएका छन् । समानुपातिक निर्वाचन पद्धतिबाट प्रतिनिधिसभा सदस्य चयन भएसँगै पाण्डेले सोमबार दिउँसो सिंहदरबारस्थित संघीय संसद् सचिवालयमा सपथ ग्रहण गरेका हुन् ।
पाण्डेलाई प्रतिनिधिसभाका सभामुख अग्निप्रसाद सापकोटाले सपथ गराएका हुन् ।
प्रतिनिधिसभा सदस्य सूर्यबहादुर केसीको निधन भएपछि रिक्त पदमा कांग्रेसले स्याङ्जाका पाण्डेलाई चयन गरेको हो । कांग्रेसले निर्वाचन आयोगमा बुझाएको बन्दसूचीमा केसीपछि खस आर्यतर्फको कोटामा पाण्डेको नाम समावेश थियो ।
प्रतिनिधिसभा सदस्यको रुपमा सपथ ग्रहण गरेपछि पत्रकारहरूसँग कुरा गर्दै सांसद पाण्डेले संघीय संसद्को गरिमा उचो बनाउन आफ्नो भूमिका रहने बताए । पछिल्लो समय प्रतिपक्षप्रति जनताको बीचमा विकास भएको धारणालाई चिर्न थप सशक्त भूमिका निर्वाह गर्ने प्रतिबद्धतासमेत पाण्डेले व्यक्त गरे ।
०३७ मा नेपाल विद्यार्थी संघमा आबद्ध भई पाण्डेले राजनीतिक यात्रा सुरु गरेका थिए । ०४३ मा नेपाल विद्यार्थी संघ त्रिभुवन बहुमुखी क्याम्पस पाल्पाको सभापति, २०४८ मा नेपाल विद्यार्थी संघको केन्द्रीय सदस्य भएर काम गरेका थिए ।
पार्टीको जिल्ला कार्यसमिति, महाधिवेशन प्रतिनिधि र महासमिति सदस्य हुँदै पार्टीमा सक्रिय भूमिकामा रहेका पाण्डे ०६४ को निर्वाचनमा स्याङ्जा क्षेत्र नं. ३ बाट संविधानसभा सदस्यमा निर्वाचित भएका थिए ।