आकस्मिकबाहेकका शल्यक्रिया नगर्न उपत्यकाका अस्पताललाई सरकारको निर्देशन
स्वास्थ्य मन्त्रालयले काठमाडौं उपत्यकाका सबै अस्पताललाई आकस्मिकबाहेकका शल्यक्रिया नगर्न निर्देशन दिएको छ । लक्षण भएका कोरोना संक्रमितको संख्या बढेकाले कोरोनाका बिरामीलाई आईसीयू र भेन्टिलेटर बेडमा राख्न आकस्मिकबाहेकका शल्यक्रिया नगर्न निर्देशन दिइएको मन्त्रालयका प्रवक्ता डा.जागेश्वर गौतमले बताए ।
सरकारले काठमाडौं उपत्यकाका सबै सरकारी अस्पताललाई कोरोना अस्पताल बनाउने भएको छ ।
स्वास्थ्य मन्त्रालयअन्तर्गत इन्सिडेन्ट कमान्ड सिस्टमको बैठकले उपत्यकामा कोरोना संक्रमितको उपचारका लागि सबै सरकारी अस्पताललाई कोभिड अस्पतालमा रुपान्तरण गर्ने निर्णय गरेको मन्त्रालयका प्रवक्ता गौतमले बताए ।
मन्त्रालयले स्वास्थ्य सेवा विभागसँग भएका भेन्टिलेटर, आईसीयु तथा अक्सिजन कोरोना संक्रमितको उपचारका लागि प्रयोग गर्ने निर्णय गरेको छ ।
यस्तै काठमाडौंको मनमोहन शिक्षण अस्पताल दहचोक र राष्टिय आयुर्वेद अनुसन्धान तथा तालिम केन्द्र कीर्तिपुरमा रहेका आइसोलेसन सेन्टरलाई लक्षणसहितका कोरोना संक्रमित राख्नका लागि कोभिड अस्पतालमा स्तरोन्नति गर्ने भएको छ ।
बैठकले अस्पतालले होटलसँग सहकार्य गरेर होटल आइसोलेसन सेन्टर सञ्चालन गर्न अनुमति दिने पनि निर्णय गरेको छ । यस्ता होटलमा संक्रमितबाहेक अरुलाई राख्न पाइने छैन ।
यस्तै, मन्त्रालयले सार्वजनिक ठाउँ तथा सार्वजनिक यातयाताबाट संक्रमण फैलन नदिन निःसंक्रमण गर्ने तथा स्वास्थ्यका मापदण्ड पालना गर्न अनुरोध गरेको छ ।
दसैंलगायतका चाडपर्व मनाउँदा कोरोना संक्रमण फैलन सक्ने भएकाले जो–जहाँ, जस्तो अवस्थामा छ, त्यस्तै अवस्थामा चाडपर्व मनाउन र त्यसका नाममा यात्रा नगर्न पनि मन्त्रालयले आग्रह गरेको छ ।
अन्तर्राष्ट्रिय सीमा नाका अझै एक महिना बन्द
सरकारले कोरोना महामारी थप बढ्न नदिन अन्तर्राष्ट्रिय सीमा नाका अझै एक महिना नखोल्ने भएको छ । सोमबार बसेको मन्त्रिपरिषद बैठकले सीमा नाका थप एक महिना नखोल्ने निर्णय गरेको एक मन्त्रीले जानकारी दिए ।
यसअघि नेपालसँग सीमा जोडिएका अन्तर्राष्ट्रिय सीमा नाका असोज मसान्तसम्म बन्द गर्ने निर्णयलाई निरन्तरता दिँदै थप एक महिना नखोल्ने निर्णय गरेको हो । त्यस्तै, बैठकले मानव अधिकारसम्बन्धी ५ वर्षीय कार्ययोजना पारित गरेको छ ।